’S e buidheann de chluicheadairean maileòidian èasgaidh a th’ ann an Còmhlan Maileòidian Nis stèidhichte ann an Nis fhèin ann am fìor Cheann a Tuath Leòdhais. Tha am buidheann air a bhith     

a’ cruinneachadh gach Diardaoin anns an ionad ciùil Taigh Dhonnchaidh bho thàinig iad còmhla an toiseach ann an 2000. Bha an àireamh de dhaoine a bha a’ cluich a’ mhaileòidian anns an stoidhle traidiseanta air a bhith a’ crìonadh, agus airson an adhbhar sin, chaidh buidheann a chruthachadh airson an seann stoidhle cluiche a chumail a’ dol. Thòisich iad gu math neo-fhoirmeil,  a’ coinneachadh dìreach airson port no dhà, cupan teatha agus beagan còmhraidh. Ann an co-bhonn ri Taigh Dhonnchaidh, thòisich cuid de na buill a’ teagasg òigridh na sgìre agus tha faisg air fichead pàiste ag ionnsachadh a’ mhaileòidian an-dràsta.